الشؤون .. عمارة بهبهاني (تحلطم)قوي

رخصة الكراج انتهت !! مومشكله .. سهالات بس اروح برج التحرير ومعاي كل الاوراق اصليه ونسخ عنها وانشالله اسبوع انا امطلعه الرخصه .. بعدها المطافي .. هم سهالات اخلصها ابيومين .. بعدها نوصل عند اعتماد التوقيع !!!!!!! لازم اجدده عند شؤون بهبهاني بالديره ! اسوأ كابوس ايمر علي بالدنيا وايكرهنا بالشغل وايكرهنا ابكل شي يتعلق بالكراج ..بتقولون ليش ؟ انا اقولكم ليش .. اسوأ مكان لتخليص المعاملات . ماكو موظفين واحد ايخلص معاملات المراجعين و واحد يتريق و10 مومداومين و6 بنات بالحمام ايسولفون وبعدها يتيمعون عند مكتب رفيجتهم ابدور ثاني يعني الزبده ان ماكو احد ايداوم وفوق هذا نفسهم خايسه وماكو ترتيب وريحه خايسه بغيت اموت. ومايقدرون الريال من المره. يعني شفيها يالمسئول ياللي مومداوم اليوم لو اتحط 3 موظفين ايخلصون المعاملات وموظفه او موظف رابع ايخلص معاملات الحريم ؟ تختصرون وقت وتخففون زحمه وريحه !! وشفيها لو جربتوا يالموظفات انكم تبتسمون واتبخرون المكان بدال لاتزيدون ريحته اخياس ابطلبات المطاعم اللي كلها ثوم وبصل من الصبح ... والله بدون مبالغه انا ماحب اظلم احد بس صراحه ماكو احد يشتغل ابذمه اهناك. الاواحد اليوم صادفته ماقصر وكسرت خاطره . انا بنت الديره واقفه بين الوافدين والرياييل . بتقولولي حطي مندوب ؟ كل يوم لهم قرار مره ممنوع مندوب مره ممنوع وكاله مره مادري قانون عجيب غريب واذا شغله سهله ماتحتاجني نفس اليوم بالجابريه قاله الريال لا لازم اهي تكون موجوده ويع عليكم والله اللي ايشوفكم جنكم مناصب بالدوله !.   من 5 سنين وانا اجدد الاعتماد ابعمري ما صادفت موظف او موظفه بالشؤون يشتغلون هذا غير اللي ايصرخون وايشخطون بالمراجعين جنه احنا انطر منهم المعامله ماجنهم ملزومين ايسوونها لنا وماجنهم يستلمون معاشاتهم من الطوابع اللي احنا المراجعين ندفعها !! صراحه ادري اني بدعت بالكلام بس شي يقهر والله مكاتب فاضيه كمبيوترات محد جاسها من انحطت واحنا اللي ناكلها وفوق كل هذا ترشيد ولاعنين خيرنا بالتكييف والله خيسونا .. اللي ايشوفهم مايشوف التأمينات اللي في برج التحرير يالله . ماشاءالله عليهم صج ناس تشتغل ابذمه وضمير ومكانهم امرتب ونظيف وضحكتهم تشرح الصدر وأرقام وشي خيال وايسهلون لك كل شي الله يعطيهم الف عافيه .. ياريت مسئول واحد ايفضي عمره ويمر الشؤون وينفضهم نفضه حلوه مع ان هالشي من الاحلام لان لو الموضوع كان بيدي جان هديت المكان ابكبره وحطيت موظفين يبون يشتغلون لو انشالله كانوا بنغاليه والله ايخلص معاملتي بنغالي اشرفلي الف مره من هالاشكال الودره اللي انشوفها الصبح .. احنا عيالكم شبابكم بناتكم لنا الاولويه عن غيرنا المفروض اتسهلون معاملاتنا بدال لاتوقفونا وتصككون البيبان بويهنا والله عيب بس منو اتحاجي ؟ المسئول اللي مومداوم اليوم ؟ ولا الوزير اللي عنده امور اهم من هالسوالف وطبعا لو تفحط ماراح ايطل ابويهك .. والله ما اقول الا الله ايسامحكم ويهديكم او ايفكنا منكم 

ملاحظه : على الحوسه واللويه ماخلصوا معاملتي